Güney Azərbaycanın faəl jurnalisti Şahnaz Qulaminin adı son zamanlar aktiv şəkildə İsveç mətbuatında hallanmağa başlamışdı. Bu mətbuat orqanlarından biri, İsveçin cənubunda yayılan "Sydsvenskan" qəzetinin onun haqqında yazdıqlarını diqqətinizə çatdırırıq. İsveçin tanınmış kütləvi informasiya orqanı Şahnaz Qulaminin tutulması barəsində belə yazır: "İranlı jurnalist Şahnaz Qulaminin İsveçə gəlməsi və Malmö Universitetində onunla görüş keçirilməsi qərara alınmışdı. Amma o, yaşadığı Təbriz şəhərində gözlənilmədən, qəfildən həbsə alınmışdı. Buna səbəb onun bu yaxınlarda müəmmalı şəkildə maşın qəzasına düşmüş 3 qardaşın ölümündə İranın Milli Təhlükəsizlik məmurlarının əli olduğunu iddia etməsidir. O, 3 qardaşdan biri İran rejiminə qarşı mübarizə aparan tanınmış şəxs idi." Daha sonra qəzet yazır ki: "Jurnalist Şahnaz Qulami ifşa etdi ki, maşın qəzasına səbəb olan yük maşını İran Milli Təhlükəsizlik orqanlarına aid olub və həmçinin ETTELAAT məmurları 3 qardaşın xəstəxanada əlacına mane olublar. O, bu xəbəri öz sitəsində yerləşdirdiyi üçün tutulub. Azərbaycan -- İsveç İcmasının başqanı Fəraşruz Rəngibər Ş.Qulami ilə bağlı belə deyir: "Mən İrandaydım, istəyirdim onunla görüşəm,o, İsveçə gəlmək üçün viza almışdı. Qulami xanım öz sitəsində işgəncə ilə bağlı və əxlaqsızlıqla məşğul olmağa məcbur olan qadınlar, həmçinin ərsiz qalıb ailənin bütün iqtisadi yükü çiynində olan qadınlar barəsində yazırdı. O, 20 noyabrda 6 ay həbsə məhkum olundu. Bu hökmün verilməsinə əsas səbəb ondan ibarətdir ki, o, qərb ölkələrində yerləşən mediyalara müsahibə verib və çalışıb ki, qadınlarla bağlı qərb ölkələrindəki normaları İran daxilində yaysın. Bunlardan da əlavə, o, İranda federal bir siyasi sistemin quruluşunu müdafiə edirdi. Şahnaz Qulami ona kəsilən qanunsuz hökmə qarşı etiraz etdi, amma heç bir cavab almamışdır. O, dekabrın 13 - də Stokholma gəlib, sonra Malmö şəhərinə gedəcəkdi."
Qəzet Azərbaycan -- İsveç Icmasının başqanının fikrinə əsasən istinad edib deyir ki: "Şahnaz Qulaminin həyatı ilə bağlı böyük təhlükə var və o, həbsdə olan zaman işgəncəyə məruz qala bilər."
Sərhədsiz jurnalistlər də Şahnaz Qulaminin həbsin məhkum ediblər. Bu təşkilatın verdiyi məlumata görə, hal - hazırda çoxlu sayda jurnalist internet vasitələri ilə çalışırlar ki, fikirlərini yaysınlar. Çünki İran rejimi xüsusən 2000 - ci ildən bəri rejimə qarşı tənqidi fikirlər yayan mediya vasitələrini ağır təzyiqlərə məruz qoyublar. Hal - hazırda İran o ölkələrdən sayılır ki, internetdə yayılan məlumatlara qarşı çox geniş şəkildə senzura qoyub.
İranın yüksək səviyyəli dövlət məmuru bir müddət bundan qabaq bəyan etdi ki, 5 milyon internet sitəsinin İranda yayılmasının qabağını alıb. O cümlədən, Facebook və youtube.
"Sydsvenska" qəzeti yazır ki: "Bu xəbərlə bağlı çalışdıq İranın İsveçdəki səfirliyi ilə əlaqə saxlayıb, jurnalist Şahnaz Qulaminin tutulması ilə əlaqədar ortaya çıxan suallarımıza açıqlama gətirsin." Amma onların şərhi ilə bağlı qəzetdə heç bir məlumat yoxdur. Ehtimal ki, səfirlik məsələ ilə bağlı şərh verməkdən imtina edib. Bunlardan da əlavə, İsveçin tanınmış feminist fəalı və jurnalist Kristina Ringsberg İran səfirliyinə Ş. Qulami ilə bağlı məktub göndərib, onun qeyri - şərtsiz azadlığa buraxılmasını tələb edir.
İran səfirliyinə göndərilmiş məktub bundan ibarətdir:
"Hörmətli Səfir, Təbrizdən aldığımız məlumata görə, İranda Qadın Jurnalistlər Assosiasiyasının ( "ROZA" ) üzvi olan və qadın hüquqlarının fəal müdafiəçisi Şahnaz Qulami 2008 - ci il 9 noyabrda İranın ETTELAAT nümayəndələri tərəfindən həbs olunub. Qulami xanım "Azer Zan" sitəsinin baş redaktorudur və 1990 - 95 - ci illər arasında 5 il müddətinə azadlıqdan məhrum olunmub, zindan həyatı yaşamışdır. 2008 - ci il iyun ayında isə may ayındakı Milli Qiyamın ildönümündəki iştirakına görə bir ay həbsdə saxlanılıb. O, həmçinin zindanda olduğu müddətdə daim işgəncəyə məruz qalıb.
Cənab Səfir, lütfən, insan haqları və insanlıq naminə, görün, Şahnaz Qulaminin azadlığa buraxılması üçün nə edə bilərsiniz.
Hörmətlə Kristina Ringsberg."
Bizim aldığımız məlumata görə, İsveçdəki İran səfiri İsveç Feminist təşkilatının fəalı K. Ringsbergin də məkbunu cavabsız qoyaraq, müraciətinə etinasız yanaşıb.
